Realtât

Un brâf e onest lavoradôr, cjatànsi simpri plui sbracajât des tassis e dal aument continuo dal cost de vite, si visà che nol podeve plui mantignì la sôs famée e mandà a scuele i fruz. Par chest al à pensât di domondà al sorestant un aument de pae, tignint cont ancje che lui al faseve tantis oris di in plui cence mai domondà un franc di plui.

Il sorestant al veve simpri stimât e laudât chel brâf lavoradôr, pe' so braure e serietât ch'al doprave tal so lavôr, tant chè in ogni casion, lu mostrave come esempli di copià.

Il bon sintiment dal sorestant (tirchio, avâr e bausâr cence limit), al à cambiât di colp umôr, cuanch'al si sintì domondà un aument di pae dal so dipendent, ritignint che un vêr afront.

Lât su dutis lis furiis j rispuint sun fà rogant: "Cumò ti mostri jò s'al è vêr che tù tu lavorîs tant". Cjolte su pene e cjarte, si meté a scrivi disint: "Un an al conte 365 'zornadis, tu però tu duarmis vot oris ogni dì: a cons fats 'a son 122 'zornadis. Altris vot oris tu lis às par fâ i fats toi e 'a son pari a altris 122 'zornadis, che mitudis dongje 'a fasin 244 'zornadis: an retsin 121. Jo ti doi miezore ogni dì parceche tu fasis la colaziòn; 'a son altris cuindis diis: an restin 106. La Domenie no tu lavoris: 'a son 52 e cussì an restin 54 'zornadis. Ten presint che la Sabide tu às mieze 'zornade di ripôs: cun chest si contin 26 diis. Mi risulte che tu fasis cuindis diis di ferîs e ancje une settemane, pôc su pôc jù, di malatie. Podopo il Prin dal An, Nadâl, Epifanie, Pasche, i Sants, la Madone d'Avôst, il prin di Maj e vie disint, dutis 'zornadis che tù no tu lavoris, e ancjemò tù tu domandis un aument di pae? Tu sês tù che tu âs di dami bês a mì!"